ANAM PANYAKIK

Manuruik data statistik
Hasie survei tukang ketik
Ado anam jenis panyakik publik
Nan indak talok jo medik

Partamo panyakik dangki jo licik
Talunjuak luruih kalingkiang bakaik
Bak cando anjiang jo gacik
Suko bana nan baun angik

Kaduo iri jo bingik
Salah sajo urang sabalik
Kasalahan urang sagadang pinjaik
Tampak dek nyo sagadang piarik

Katigo somboang jo picik
Kapalo gadang utak kicik
Dado bidang hati sampik
Pantang tasingguang sadikik

Ka ampek ceke balapik
Hari hujan payuangnyo kapik
Jalan buruak kureta nyo irik
Mambali gabelo makan nak ajik

Dunie di kacak sakuih ba jaik
Ingin bagaua tapi sampilik
Karajo maleh makan sasumpik
Muncuang cipeh bedo caringik

Kalimo somboang jo syirik
Ndak picayo ka Sang Khaliq
Suko bana magic jo mistik
Kawannyo syetan jo palasik

Ka anam mantiko cirik
Acok bana mambari angik
Nan busuak nyo kapik-kapik
Baa nak berang urang sabalik

Katiko sadang tasapik
Di lapehan urang nyo gigik
Di dulukan urang nyo irik
Di bulakang urang nyo tuncik

Lah nyato nan salah mancik
Lumbuang nan nyo arik
Berangnyo ka pipik
Padi nan nyo sabik

Suko mancari ilik-ilik
Ma ambiek kesempatan di nan rumik
Dima tampek nan sampik
Disitunyo manyalingkik

Kasalahan urang nyo ungkik-ungkik
Kasalahan awak ba himpik-himpik
Salah urang sagadang pinjaik
Nampak sagadang piarik

Nan gadang nyo racik-racik
Nan laweh nyo sayik-sayik
Nan jauah nyo gabik-gabik
Lah urang nyo landik

Anamkolah jenis panyakik
Nan ubeknyo sabanak sulik
Dukun pusiang dokter pun rumik
Ndak bisa dihituang jo matematik

Bukan turunan atau genetik
Bukan panyakik buatan pabirik
Tapi ulah salah didik
Hilang sopan jauah taratik

Ikolah kini panyakik publik
Dalam organisasi jo politik
Panuah trik jo taktik
Sarek jo intrik-intrik

KARANO ITU ..
JAN SAMPILIK ..
JO KAJAI BA LAPIK …
IDUIK LAH BATARATIK …
HIK HIK HIK …
GALAK SA PINJIK ..
NAK JAN SAKIK ..
MANCALIEK URANG BA SALINGKIK …
MAMPARABUIK AN KURISI NAN KICIK …

Leave a Reply